giovedì 09 settembre 2010     

Ardia de Santu Antinu – De su 2009

Su sero de su 6 e su manzanu de su 7, in Santu Antinu, si faghet S'Ardia.
S'Ardia (dae su verbu bardiare, chi cheret nàrrere azuare, fàghere sa guardia) est una de sas prus cummoventes manifestatziones de sardidade e benit ammentada tra sas prus importantes festas de sa Sardinna po fede, traditzione, trisinamentu umanu e arribant medas turistas.
Sa cursa ammentada sa gherra binchia dae s'Imperadore Costantinu contra a Massenziu in su Ponte Milvio in Roma in su 312 Apusti de Cristu. Sa festa si faghet in su Santuariu, chi si atzapat unu chilometro atesu dae sa bidda. Su percursu est sia aintro chi in fora de sa corte de Santu Antinu, serrada de unu muru chi serrada sa cresia, sos muristenes e sa domo de su eremitanu (chi controllaiat sa corte).
Si podet bintrare in sa corte dae duos portales: unu est fatu de pagu e est de contone e cimentu e s'ateru est prus antigu, de su XVI seculu, connotu comente su portale de ferru.
Sa prima pandela, chi tempus innanti si fut iscritu in su rezistru de sas pandelas chi costoit su retore, faghet sa cursa azuau dae duos: sa segunda e sa tertza pandela.
Tres cadderis chi cun sas iscortas, seberadas dae onni pandela, gherrant po non che fàghere colare sas tres pandelas e totu sos cadderis chi bi sunt in fatu.
Su borta de die de su 6 de triulas su retore zat sas pandelas: sae de brocau colore oro mutia sa pandela de Santu Antinu a sa prima pandela, sa pandela ruia a sa segunda e sa bianca a sa tertza e poi sos pinnones ruios po sas iscortas.
Retore, sindigu, pandelas, iscortas, cadderis andant cara a Santu Antinu acumpanzaos dae sos fusileris chi sinnant sos momentos prus importantes de sa cursa.
A poi de una frimada in Su Fronte Mannu chi che leada a Santu Antinu, arribant a su Frontigheddu dae in ue partit s'Ardia.
S'Ardia podet comintzare: sa prima pandela depet cumpredere su momentu propitziu po iscapare dae su Frontigheddu, intrande in s'arcu de Santu Antinu, sighiu de sos ateros cadderis. Arribaos a sa cresia, si faghent sos ziros, chi depent èssere nessi chimbe ma semper in nùmeru dispari.
Sa cursa sighit cun sa calada a sa Muredda, fata in tundu cun pedra e cimentu e zust'in mesu b'at una rughe.
Finiu unu momentu de pregadoria, sos cadderis faghent tres ziros a manu ereta e bòrtada s'Ardia nde podent fàghere unu o prus de unu a manu manca. S'Ardia che finit cando torrant a pigare a sa cresia. S'Ardia est eguale su manzanu de su 7.
Su borta de die de su 7, si faghet sa cufessone intro de sa bidda in laude po su Santu intro de die.
Sa die de s'otada, chi po usantzia est sa segunda dominiga chi sighit s'urtima die de sa festa, in su matessi logu, a su manzanu si faghet s'Ardia a pè.
Sa festa est organizada de su sòtziu Santu Antinu.

Allegati:

  Programma.PDF  (27 KB)

---

---

©2008 Comune di Sedilo  |  Sito sviluppato da Kronoweb   |   Accessibilità  |   Accesskey  |     |